My pad na ‘n gesonder lewe(nsstyl)


Ek probeer hierdie stuk geskryf kry vir die afgelope drie weke. Ek het al baie geskryf voor vandag (12 Januarie 2013). Soos wat ek nou weer daardeur lees, besef ek weer hoe baie ek daaraan verander.

My oorspronklike gedagte met hierdie stuk, was om te praat oor een van my nuwejaarsvoornemens: om gewig te verloor, gesond te raak en fiks te raak. Die basiese gedagtes bly dieselfde, maar die woorde verander baie…

So, sonder dat jy as leser dit besef, hier gaan ek WEER…

Ek probeer al lank om omtrent 100kg te weeg.

Indien ‘n persoon wil gewig verloor, is daar ‘n paar basiese dinge wat jy moet doen, soos:

  • Oefen!
  • Reg eet
  • Wel, dit is al waaraan ek kan dink vir nou…

Ek het hierdie amazingly awesome gym-kontrak by Virgin Active – nou al vir omtrent drie jaar (ek sal in een van my volgende inskrywings ‘n meer presiese tydperk gee).

Ek onthou die eerste jaar van my oefeninge baie goed. Ek het omtrent vyf (5) keer per week geoefen – en ernstig geoefen! Ek moet sê, ek het nogal fiks geraak ook (alhoewel waarskynlik nie Comrades-hardloop fiks nie!).

Êrens na daardie eerste omtrent twaalf maande het iets egter gebeur… Ek het moeg geraak van hard oefen, en “net” so twee (2) kilogram per maand verloor… Ek het nie regtig ernstig gedink dat dit ‘n proses is om gewig te verloor nie… En ek het ook nie regtig, ten spyte van my oefen-program, super gesond geëet nie.

Ek dink ek het verkeerde verwagtinge ook gehad… Ek het verwag dat gym altyd awesome sal wees… Ek het verwag dat gewigsverlies sal kom sonder ‘n beter eetplan… Ek het verwag dat fiksheid sal kom binne ‘n jaar…

In die volgende jaar en ‘n half (omtrent 18 maande) het ek baie wisselvallig geoefen… En baie minder gesond geëet. Ek het darem altyd binne so ‘n mikpunt gewig van so net onder 130kg geweeg (nadat ek op ‘n stadium omtrent 120kg geweeg het!).

Ek het omtrent so ses (6) keer per maand geoefen, net om my Discoverycoverage lewendig te hou (meer daaroor in ‘n latere inskrywing.

In omtrent die tweede week van Desember 2013 is ek een dag gekonfronteer met ‘n 134kg op die skaal. Net daar het ek besef ek moet weer ernstig begin oefen, en begin werk aan ‘n beter eetplan… My lewe hang daarvan af!

Sedertdien het ekomtrent 5-6 keer per week geoefen.

Ek oefen nie vreeslik hard nie. Ek het al agter gekom dat as ek elke dag bietjie oefen, ek nie twee (2) keer per week super hard hoef te oefen nie…

Ek is ook redelik onfiks gewees aan die begin van hierdie ernstige oefentyd, so ek werk so stadig maar seker om weer my fiksheid terug te kry.

Dit is ‘n proses…

Een van my ander nuwejaarsvoornemens is om meer te blog.

En hier kruis sommer twee nuwejaarsvoornemens… Die voorneme om meer te blog, en die voorneme om gesonder te raak.

Ek gaan hierdie jaar ‘n reeks blogs skryf, getiteld “My pad na ‘n gesonder lewe”. So, hierdie is die eerste inskrywing vir hierdie nuwe reeks wat ek hierdie jaar begin…

My pad na ‘n gesonde lewe: Deel 1 – Die besef om gesond te eet en te oefen

My gesondheid…


Ek probeer redelik gereeld in die gym kom, en ek probeer om meer gesond te eet.

Tot so ses maande terug was dit ‘n stelling wat 100% waar was van my eie lewe. Ek het nie ‘n super-perfekte dieët gehad nie. Ek het wel net gekyk na wat ek eet. Dit is die bekende gedagte van minder stysel, en so aan. Ek was omtrent elke dag in die gym gewees. Ek het ‘n redelik gebalansseerde oefenprogram gehad.

Êrens in die afgelope ses maande het ek egter minder getrou geoefen en “lekkerder” begin eet. Ek het 3 dae in plaas van ses dae van die week geoefen, en later een dag elke twee weke. Ek het myself verdedig, deur te sê dat ek baie besig is met studies en stiltetyd (wat dalk ook ‘n post van sy eie gaan kry op ‘n stadium). Ek het myself ook getroos met die feit dat ek darem twee keer per week hokkie oefen. Dit was egter net vir ‘n kort tydtjie van so twee maande waar. En toe ek ophou hokkie oefen het (omdat ek in elk geval nie fiks was of regtig skills gehad het nie), het ek nie weer begin met gereelde gymwerk nie. Ek het so 2-3 keer per maand geoefen. Skandelik, ek weet!

Ek het ook minder moeite gedoen met my dieët. Soos ek hierbo geskryf het: ek het nooit ‘n super-perfekte dieët gehad het nie. Ek het wel so min of meer sekere kosse geëet en ander kosse vermy. Op ‘n manier het my “slacking” in my oefenprogram egter gely na ‘n “slacking” in my dieët. Ek het nog altyd die geneigdheid gehad om te eet as ek stress. Die afgelope paar maande was ook effens stresvol in my lewe. Die ou gewoonte van eet-onder-stres het sterk na vore gekom.

So drie weke terug het ek in een van my min gymsessies weer op die skaal geklim. Ek het myself amper in ‘n ander bloedgroep ingeskrik toe ek sien wat gebeur het. Ek het daardie dag omtrent 128 kg geweeg! Toe ek begin oefen het, het ek net meer as 130 kg geweeg. Aan die begin van die jaar het ek net minder as 115 kg geweeg! Dit beteken ek het wel in amper twee jaar drie kg verloor, maar dat ek in minder as nege maande amper 15 kg opgetel het! Ek kon dit nie glo nie. Het ek myself so erg “laat gaan”?

Mens kom nie regtig agter hoe ongesond jy leef totdat jy so hard gekonfronteer word daarmee nie.

In die afgelope drie weke het ek elke dag geoefen. Een week daarvan het ek by die see deurgebring, en daar was gelukkig elke dag geleentheid om ‘n lang ent te stap. Die ander week was ek omtrent elke dag in die gym gewees.

Hierdie sal een van die doelwitte word van hierdie nuwe blog van my: Om myself op my tone te hou en elke dag meer moeite te doen met my oefening- en eetprogram. Ek hoop eintlik dat daar iemand sal wees wat my sal join in die poging om gesond te raak, wat geïnspireer sal raak om self gesond te begin lewe, en wat my ook sal roep tot verantwoording oor my eie oefen- en eetprogram.

So hierdie sal waarskynlik ‘n reis wees vir my, en hopelik sal iemand geïnspireer voel om die reis saam met my aan te pak.

Tot volgende keer